«Полиция көмектеспеді»: Ақмолада түлекті аяусыз ұрып, көлікпен қағуға оқталған екі ер адам ұсталды

Ақмола облысы Ақкөл ауданында 18 жастағы мектеп түлегі Роман Пауковты екі ер адам аяусыз соққыға жықты, деп хабарлайды Orda.kz.

Оқиға 21 маусым күні кешке болған. Зардап шеккен баланың анасы Инна Паукованың айтуынша, екі ересек ер адам алдымен ұлын көлікпен қағып өтпек болып, кейін көліктен түсіп, есінен танғанша сабаған.

«Бұл расымен айуандық. Олар жабайы аң сияқты ұлымды соққыға жықты. Роман өзін қорғай да алмады, денесі түгел көгеріп қалған», — дейді анасы.

Оқиғаның ең жан түршіктірер тұсы — жанұшыра көмек сұраған ананың сөзінше, төбелес кезінде сол маңда жүрген полиция қызметкері еш әрекет етпеген. Анасының айтуынша, тәртіп сақшылары ұрып-соғуды тоқтатуға да, араша түсуге де талпынбаған.

Шабуылдан кейін Роман басы мен беті жарақаттанған күйі ауруханаға жеткізілген. Ал шабуыл жасағандар Романның отбасына қысым көрсетіп, полицияға шағымданбауға мәжбүрлемек болған.

Инна Паукова алғашқыда полиция тарапынан ешқандай ресми құжат берілмегенін, тек прокуратураға жүгінгеннен кейін ғана қылмыстық істің тіркелгенін айтып отыр.

«Олар бізді балағаттап, қорқытты. Таныстарын араға салып, татуласуға көндіргісі келді. Бірақ мен үнсіз қала алмаймын. Бұл менің ұлымның өмірі», — дейді ол.

Облыстық полиция департаменті шабуыл болған күні «Бұзақылық» бабымен қылмыстық іс қозғалғанын хабарлады. Қазіргі таңда қақтығысқа қатысқандар анықталып, олардан жауап алынған. Тергеу амалдары жалғасып жатыр.