Полиция Бишімбаев пен Шәріптің бейнеролигінде заң бұзушылық жоқ екенін мәлімдеді

Полиция бұрынғы ұлттық экономика министрі Қуандық Бишімбаев пен актер Серік Шәріпті бейнелеген жасанды интеллект жасаған бейнероликте заң бұзушылық жоқ екенін мәлімдеді, деп хабарлайды Orda.kz.

Желіде «желдей» есіп кеткен бейнероликке қатысты Алматы полиция департаменті ешқандай құқық бұзушылық болмағанын айтты.

«Бұл жағдай бойынша тексеру жүргізілді. Бейнематериалды жасағанда азаматтардың жеке өміріне қол сұқпау, дербес деректері және басқа да құқықтарына қатысты заңнаманы бұзу анықталған жоқ. Тексеру нәтижесінде құқық бұзушылық болмауына байланысты өтінішті қараусыз қалдыру туралы шешім қабылданды», – деп хабарлады қалалық полиция департаменті.

Жасанды интеллект технологиясы арқылы жасалған роликте Бишімбаев пен Шәріп түрме камерасында отыр. Бишімбаевтың актерді жұбатып, иығынан сипағаны бейнеленген.

Еске сала кетейік, актер кездесіп жүрген қызын лифт ішінен күштеп шығарып, шапалақпен ұрғаны жайлы ақпарат тараған еді. Осы сәттің бейнежазбасын қоғам қызу талқылады. Артынша Шәріп жұртшылықтан кешірім сұрап, заң алдында толық жауап беруге дайын екенін мәлімдеді. Сот оған бес тәулік әкімшілік қамау жазасын тағайындады.