Полиция белсенділерге шарт қойды: Шыңжаңдағы туысын іздегендер босатылды

2 желтоқсан күні Алматы қаласыда Республика сарайының алдына келген бірнеше әйелді Медеу ауданының полиция басқармасы басшысы Дәурен Өтебаев бастаған бір топ сақшы ұстап әкетті. Полиция туысымен табысуға мүмкіндік беруді сұрай-сұрай белсендіге айналған азаматтарға ескерту мәнінде шарт қойғаны айтылды.

Бірнеше сағаттан кейін белсенділер босатылды. Арада үш жарым сағат өткенде, 15.30 шамасында Нұрзат Ермекбаймен байланысу мүмкіндігі туды. Оның айтуынша, Медеу аудандық басқармасына жеткізілген соң полиция қызметкерлері туысын іздегендерге шарт қойған.

- Сіздер заңсыз митингке шығып жүрген соң бұйрық берді. Олар «консулдық алдына бармасаңыздар, осы 3,5 сағатта шығарамыз» деді. Егер ертең қайта барар болсақ, тағы да ұстап алып келетінін, түнге дейін ұстайтынын ескертті. Басқа шара қолданған жоқ. Сонда жүрген полицейлердің айтқаны – консулдыққа бармай, үйге қайтыңдар деді. Бармаймыз деген соң, шығарып жіберді, - деді 13 жылға «нақақ» сотталған ағасын босатуды сұрап жүрген Ермекбай.

Шыңжаңдағы туыстарын босатуды талап еткен бір топ қазақстандық тоғыз айдан бері Қытай консулдығының алдында наразылық өткізіп келеді. Бұл жолы елшілік ғимаратынан тыс жерге қолына плакат я көрнекі құрал ұстамай, журналиске сұхбат беруге келген аналардың ұсталуы жайлы нақты түсініктеме бермеді.

Редакция тілшісі оқиға орнында полицейлердің Халида Ахытхан, Нұрзат Ермекбай, Гаухар Құрманалиева және Гүлбарам Өмірәліні автобусқа мінгізіп, алып кеткеніне куә болған. Ұстау барысында Медеу ауданының полиция басқармасының басшысы Дәурен Өтебаев Әкімшілік кодексінің 488-бабы (Бейбіт жиналыстарды ұйымдастыру және өткізу тәртібі туралы заңнамасын бұзу туралы – ред.) негізінде ұстағанын алға тартты.

Халықаралық қауымдастық 2017-2018 жылдары Қытайдың Шыңжаң түркітілдес этностарды жаппай «қайта үйретуге» шақырта бастаған саясаты «геноцидке» ұласқанын сынап келеді. Концлагерь тәрізді нысандар туралы түрлі ірі зерттеулер жүргізілсе де Бейжің мұны мойындамайды. Бірнеше жылдан бері қазақстандықтар көрші елдегі туыстары мен отбасы мүшелері қысым көріп, жазықсыз сотталып жатқанына наразы. Қазақстан билігі Қытайдағы қандастардың мәселесі бөтен елдің ішкі саясаты деген ұстанымда.

Авторы: Асан Анарбайұлы