«Педофил — Алланың барына дәлел»: Нұр-Мүбаракта имам жұрттың жағасын ұстатты

Алматы қаласындағы Нұр-Мүбарак ислам мәдениеті университетінде оқылған дәрістегі «педофилдің болуы — Алланың барына дәлел» деген ұстаздың сөзі әлеуметтік желіде қызу талқыға түсті, деп хабарлайды Orda.kz.

Әлеуметтік желіде Нұр-Мүбарак ислам мәдениеті университетінде ұстаздың өткізген дәрісі тарап кетті. Бейнежазбада ұстаз Алланың барына дәлелдердің бірі ретінде педофилдердің бар екенін алға тартады. Желі қолданушылары бұл мысалдың мәнін және ұстаздың не айтқысы келгенін түсінбей, наразылық білдірді.

«Педофилдің болуы — Алланың бар екеніне дәлел. Неге олай деп ойлайсыздар? Жігіттер, егер Алла болмаса әрі біздің қалауымыз болса, онда педофил болмас еді. Біздің қалаған нәрсенің қарсысы болып тұр. Ол нені білдіреді? Онда сенің қалауыңның орындалмауын біреу қалап тұр. Сенде бүкіл нәрсенің орындалмауы осыған дәлел», — деді дәріс оқушы.

Ұстаздың аты-жөні әзірге белгісіз. Алайда видеоны жариялаған әлеуметтік желі қолданушысы оның дәл осы діни оқу орнында ұстаздық ететінін жазған.

«Бұдан төмен қайда жаққа құлдырауға болады? «Педофилдер — Алланың бар екенінің дәлелі».
Айтпақшы, бұл сөзді қарапайым адам емес, Алматыдағы Нұр-Мүбарак ислам университетінің оқытушысы айтып отыр», — деді желі қолданушысы.