Павлодарда өгей қызын зорлаған ер адам 23 жылға сотталды

Павлодарда өгей қызын зорлаған ер адам 23 жылға сотталды. Зорлық жасаған көпбалалы әкенің ірі кәсіпорында жұмыс істегені белгілі болды, деп хабарлайды Orda.kz.

Сот оны өгей қызын зорлағаны үшін колонияға жіберді. Ол Қылмыстық кодекстің «зорлау» және «кәмелетке толмағандарға қатысты күш қолдана отырып немесе күш қолдану қаупін төндіріп, жәбірленушінің дәрменсіз жағдайын пайдаланып жасалған жыныстық сипаттағы зорлық әрекеттері» айыптары бойынша сотталды.

Сот жабық түрде өтті.

Ер адам қызды алғаш рет сегіз жасында (2017 жылы) зорлаған.

Сол кезде болашақ өгей әкесі оның анасымен кездесіп жүрген еді. Кейін екеуі заңды некеге отырып, отбасы Майқайың ауылына көшті. Сол жерде өгей әке баланы қорлауды жалғастырған.

Сотталған адам төрт кішкентай баланың әкесі, ұсталғанға дейін Павлодар облысындағы алтын өндіретін кәсіпорында слесарь-жөндеуші болып жұмыс істеген.

Үкім заңды күшіне енген жоқ.

Еске сала кетсек, Павлодар облысында бүкіл елді есеңгіреткен тағы бір қылмыстық іске нүкте қойылған еді. Өгей әкесінің төрт бірдей қыз баланы бірнеше жыл бойы зорлап келгені белгілі болып, сот оны 20 жылға бас бостандығынан айырды.