Павлодарда баланы сүндетке отырғызған кезде денсаулығына зиян келтірген дәрігер сотталды

Павлодарда  баланы сүндетке отырғызамын деп денсаулығына ауыр зиян келтірген хирургке қатысты сот шешімі шықты, деп хабарлайды Orda.kz.

Қалалық қылмыстық істер жөніндегі мамандандырылған ауданаралық соттың мәліметінше, А. есімді дәрігерге Қылмыстық кодекстің 317-бабы 2-бөлігі бойынша медицина қызметкерінің кәсіби міндеттерін дұрыс атқармауы айыбымен іс қозғалған.

Тергеу материалдарына сәйкес, 2023 жылдың 23 тамызында хирург кәмелетке толмаған балаға сүндеттеу отасын жасаған. Салдарынан дәрігердің салғырттығынан баланың денсаулығына ауыр зиян келген.

Прокурор айыпталушыны бір жылға бас бостандығынан айыруды сұрады. Жәбірленушінің заңды өкілі мен өкілдері де ең қатаң жаза тағайындауды талап етті. Өз кезегінде А. кінәсін мойындамай, ақтауды сұраған.

Сот дәрігерге бір жыл мерзімге бостандығын шектеу жазасын тағайындап, пробациялық бақылау орнатты. Сонымен бірге ол қоғамдық жұмыстарға тартылатын болды.

Сондай-ақ, дәрігер бір жыл бойы хирург лауазымында медициналық қызмет көрсету құқығынан айырылды.

Еске сала кетейік, Қазақстан Мұсылмандар Діни Басқармасының өкілі әртіс, әзілкеш Ғалымжан Құрманбек «жұмаққа билет» сатқан бейнежазбасы туралы жауап бергені туралы жазған едік.