P. Diddу қыз зорлағаны үшін 50 жылға бас бостандығынан айырылуы мүмкін

Нью-Йоркте американдық рэпер және музыка әлеміндегі танымал жұлдыз P. Diddy-ге қатысты сот басталды, деп хабарлайды Orda.kz. 

Музыкантқа бірден бес бап бойынша айып тағылып жатыр. P. Diddy-ге адам саудасымен айналысып, жасөспірімдерге жыныстық зорлық-зомбылық жасаған және әйелдерді жезөкшелікке тартқан деген айып тағылды. Прокурорлардың пікірінше, музыкант өзінің атақ-даңқына сеніп қыздарды пайдаланған. Әрі ұйымдасқан қылмыстық топ құрған. 

P. Diddy сот залына келді. Таңертеңнен бастап ғимаратты БАҚ өкілдері қоршап алды. Олар Комбстың анасы мен оның балаларын да суретке түсірді. 55 жастағы музыкант өзіне тағылған барлық айыпты мойындамай отыр.

Тергеу мәліметінше, ол әйелдерді тұншықтырып, ұрып, тепкілеп, шашынан сүйреген. Оларға ішімдік ішкізіп, есіркі қолдануға мәжбүрлеген. Ал оның қылмыстық тобы музыканттың нұсқауы бойынша АҚШ-та және өзге де шетелдерде қонақүй нөмірлерін әзірлеген. Бөлмеге арнайы жарықтандыру орнатқан, қосымша төсек-орын мен интимдік керек-жарақтарды түгендеген. Егер сот рэперді кінәлі деп тапса, ол 15 жылдан 50 жылға дейін бас бостандығынан айырылуы мүмкін.

Еске салайық, рэпер 2024 жылдың күзінде ұсталған еді. Оның үстінен 120-дан аса арыз түскен. Арыз берушілердің көбі жасөспірім және кәмелеттік жасқа толмаған қыздар. Кейіннен оның ер адамдарды қорлағаны да белгілі болды.