Отардағы әскери бөлімде жағы сынған сарбазға қатысты тың дерек пайда болды

2026 жылғы 10 қаңтарда Жамбыл облысы Қордай ауданына қарасты Отар ауылдық округіндегі Гвардейский кентінде орналасқан ҚР Қорғаныс министрлігінің №21450 әскери бөлімінде мерзімді әскери қызметкер Қапар Есбол Қалыбекұлы соққыға жығылып, ауыр дене жарақатын алған. Оның жақ сүйегі сынып, ота жасалғаннан кейін оны әскерилер екі апта жалдамалы пәтерде ұстаған. 

Orda.kz редакциясына Қапар Есболдың қорғаушысы Ғабит Өмірбеков сұхбат беріп, істің бұрмаланып жатқанын айтты. Оқиғаға бөлімнің келісімшарт бойынша әскери қызметкері, сержант Сайланұлы Айдынның қатысы бар екені мәлім болды. 

Қақтығыс қалай басталған?

Сержант Сайланұлы Айдын мерзімді әскери қызметкер Есбол Қапарды сапта тұрған кезінде бірнеше рет балағаттап, ар-намысына тиетін сөздер айтқан.

«Есбол, оның әрдайым осылай балағаттауына намыстанып, оған сөз қайтарған. Осы кезден бастап екеуінің орталарында түсінбеушілік туындаған. Кейін, сержант Сайланұлы Айдын, қатардағы жауынгер Есболды жеке шақырып оған сөз қайтарғаны үшін және әріптестерінің алдында абыройын түсіргені үшін Есболды көрген сайын балағаттап, ар намысына тиетін сөздер айтатынын жеткізген», - дейді адвокат Ғабит.

Спортзалдағы соққы

10 қаңтар күні күндіз сержант Сайланұлы Айдын басқа сарбаздардың көзінше Қапардың намысына тиетін сөздер айтып, тиісе берген. Қапар оның сөздеріне мән бермей, елемеуге тырысқан.

Алайда бұл жағдай сержанттың ашуын күшейткен. Ол Есболмен жеке сөйлесетінін айтқан.

«Сол күні сағат 17:00 шамасында №21450 әскери бөлімінің екінші казармасының спорт залына сержант Сайланұлы Айдын  мерзімді әскери қызметкер Қапар Есбол Қалыбекұлын ертіп келген. Сайланұлы Айдынның қасында екі таныс емес сержанттар болған. Бірақ спортзал ішіне тек Сайланұлы Айдын мен Есбол екеуі кірген. Сол кезде Сайланұлы Айдын,  Есболдың бетінен шапалақпен тартып жіберген. Осы соққыдан кейін Есбол Айдынды итеріп жіберген кезінде,  Есболдың бет тұсынан темірмен ұрған. Соққы Есболдың арт жағынан жасалған», - деді Ғабит.

Соққыдан кейін Есбол тізерлеп отырып қалған. Осы кезде сержант Айдын оның тұмсығына аяғымен тағы бір соққы жасап, оқиға орнынан кетіп қалған. Сөйтіп Есбол тек жағыннан ғана емес бірнеше жерінен соққы алған екен.

Ғабит мырзаның айтуынша Есболды қатардағы бірге әскери борышын атқарып жүрген сарбаз соққыға жығып, соққы алған деп істі бұрмалап жатыр екен. 

Қылмыстық іс тіркелді

Аталған дерек бойынша ҚР Бас прокуратурасының Сотқа дейінгі тергеп-тексеру қызметінің (арнайы прокурорлар) бөлімінде қылмыстық іс тіркелген. Қазіргі уақытта сотқа дейінгі тергеп-тексеру амалдарын арнайы прокурор жүргізіп жатыр.

Оқиғаның барлық мән-жайы анықталуда.

Оқи отырыңыздар: 

• 26 жерінен пышақтап, мәйітін зорлаған: Диананың анасы сот үкімімен келіспей отыр
• «Төмен баға ұсынған»: Астанада пәтерлерді екі реттен сатқан құрылыс компаниясы қызметкерлері қамалды