Orda.kz журналисі Сандуғаш Дүйсенова жариялаған мақалалары үшін полицияға шақырылды

Orda.kz журналисі Сандуғаш Дүйсенова жариялаған мақалалары үшін полицияға шақырылды. 22 сәуір күні сағат 17:00-де тілшімізге полиция департаментіне шақырту келген.

Сандуғаш Дүйсенованың өзі оған қатысты қылмыстық іс қозғалғанын хабарлады. Кейін ол куәгер ретінде жауап алуға шақырылғанын мәлімдеді. Бұл туралы оған Жетісу облыстық полиция басқармасының өкілдері телефон арқылы хабарлаған.

«Мен сағат 17:00-де полицияға баруым керек. Біреу мені әдейі жалған ақпарат жариялаған деп сыртымнан тон пішкен көрінеді. Мен кімнің жолын кесіп өткенімді білмеймін. Бірақ қазір куәлік беруім керек. Мен заңсыз ештеңе істеген жоқпын, мен жай ғана білетін фактілерді айттым», — деді ол.

Қылмыстық іс қозғауға Сандуғаштың 2025 жылдың қаңтарында Талдықорғанда Бақпаевтар әулетінің үйінде болған өрт туралы жарияланымы себеп болуы мүмкін.

Бұған дейін Сандуғаш Дүйсенованың өткір материалдары мемлекеттік қызметкерлерді ұдайы тұқыртып отырды. Олар үнемі журналист пен редакцияны сотқа беретіндерін айтып, сес көрсететін.