Orda.kz редакциясына қаруланған әскерилер келіп, тінту жүргізіп жатыр

Orda.kz редакциясына қара киінген арнайы әскери адамдан келіп тінту жүргізіп жатыр. Біз Алматыдағы әріптестерімізге шамамен бір сағаттан бері хабарласа алмай отырмыз. Адвокатымыз барған кезде де еш нәрсе түсіндірместен әскерилер есікті тарс жауып алды, деп хабарлайды Orda.kz.

Алматы қаласындағы редакцияда тінту жүріп жатыр. Ғимарат маңында қара киімдегі адамдар жүр, нөмірсіз көліктер тұр. Қазір жағдайды Orda.kz адвокаттары анықтап жатыр.

Адвокат Мұрат Адам кеңсеге келсе де, оны ішке кіргізбеді. Оның айтуынша, қаруланған әскерилер құжаттары мен қорғаушы ретіндегі мәртебесін көрсе де оны итеріп шығарып жіберді.

«Тергеу әрекеттеріне қатысуға құқығым бар, бірақ мені кіргізбеді. Бұл адвокат ретіндегі қызметіме кедергі келтіру. Шағымдарды дайындап жатырмын», — деді ол. 

Еске сала кетсек, тәуелсіз «Орда» редакциясына бұған дейінгі шабуылдан кейін Гүлнәр Бажкенова Еуропалық ұйымның жиынында сөз сөйлеген еді. 

Редакцияның заңгері Ольга Диденко Azattyq тілшілеріне оны ғимаратқа кіргізбегенін растады. Оның сөзіне қарағанда, оған тінту туралы қаулы немесе рұқсат қағаздары көрсетілмеген.

«Тергеу әрекеттерін кім жүргізіп жатқанын, қандай бап бойынша қылмыстық іс ашылғанын және кімге қатысты екенін білмейміз. Топ басшысы ешбір сұраққа жауап бермейді», — деді ол. 

Қадірлі оқырман, Orda.kz ары қарай ақпарат таратуды жалғастырады. Істің мән-жайынан хабар беріп отырамыз.