Нұрсұлтан Назарбаевтың інісі банкрот деп танылды

Марқұм Болат Назарбаевтың ұлы Нұрбол Назарбаевқа қатысты банкроттық іс қозғалды, деп хабарлайды Orda.kz.

Ол шамамен 57 млрд теңгеден айырылған.

Дереккөздердің мәліметінше, Нұрбол Назарбаевтың есепшоттары мен мүлкіне тыйым салынған. Компаниялардағы үлестеріне шектеу қойылып, елден шығуға да рұқсат жоқ.

Еске сала кетейік, Нұрбол Назарбаев – марқұм Болат Назарбаевтың ұлы, елдің бұрынғы президенті Нұрсұлтан Назарбаевтың немере інісі. Ол бірнеше жылдан бері кәсіпкерлікпен айналысып, Алматыдағы ірі нарықтар мен жер телімдеріне иелік еткені жөнінде жиі айтылып келген.

2025 жылдың қыркүйегінде сот шешімімен оның 57 млрд теңге көлеміндегі активтері мемлекет меншігіне қайтарылды. Бұған қоса, 925 млн теңге айыппұл және 230,4 млн теңге көлемінде келтірілген залалды өтеу міндеттелді. Барлық банк шоттары бұғатталды.

Бұл жағдай Болат Назарбаев әулетіне қатысты алғашқы дау емес. Бұған дейін қоғамда олардың «Алтын Орда» базарына және Алматы маңындағы жер телімдеріне қатысты заңсыз иелену фактілері жиі талқыланған.

2023 жылы бірқатар БАҚ-та «Алтын Орда» нарығының айналасында рейдерлік жолмен иемдену туралы мәліметтер тараған. Кейін бұл ақпарат ресми органдар тарапынан нақты расталмағанымен, нарықтағы меншік құрылымына байланысты сұрақтар ашық күйінде қалған.

Бұған дейін де бірнеше депутат Назарбаев әулетінің бизнесіне байланысты тергеу жүргізуді талап еткен. 2025 жылдың қазан айының басында Мәжіліс депутаты Айдос Сарым да Нұрбол Назарбаевтың істеріне қатысты қосымша тексеріс қажет екенін мәлімдеген болатын.