Нұрайдың адвокаты түсініктеме беріп тұрған бейнежазбаны таратқандарға шағымданды

Шымкентте Нұрайдың отбасының адвокаты оның полиция қызметіне түсініктеме беріп тұрған бейнежазбаны таратқандарға шағымданды, деп хабарлайды Orda.kz.

Бейнероликті осы іске қатысты жұмысынан қуылған полиция қызметкері таратқан болатын. Кадрда Нұрай оны алып қашқан жігітке ешқандай айып тақпайтыны жайлы айтқан. Марқұмның отбасының адвокаты Серікжан Нұрпейісов іс бойынша құпия дәлелдемелер таратқан  полиция қызметкерінің үстінен шағым жазды.

«Бұл біз үшін күтпеген жаңалық деп айта алмаймыз. Біздің ойымызша, бейнежазба тергеу барысында ұсынылуы тиіс дәлел және іс ресми аяқталғанға дейін оны жариялауға болмайды. Осы оқиғаға байланысты қазір құзырлы органдарға шағымдандық», - деді адвокат Нұрпейсіов.

Айта кетейік, Шымкент қаласында болған қайғылы жағдайдан кейін Нұрайдың шағымын елемеген полиция қызметкерлеріне қатысты қылмыстық іс қозғалған болатын.