Нью-Йорк әуежайында ұшақ өрт сөндіру көлігіне соғылды: Зардап шеккендер бар

Монреальдан Нью-Йорктегі Ла-Гуардия әуежайына ұшып келген ұшақ қону кезінде өрт сөндіру көлігіне соғылды. Салдарынан бірнеше адам зардап шекті, деп хабарлайды Orda.kz New York Post-қа сілтеме жасап.

Air Canada әуе компаниясының ұшағы өрт сөндіру көлігіне соғылып, порт әкімшілігінің екі қызметкері ауыр жарақат алды. 

Зардап шеккен полиция қызметкерлері әуе кемелеріне қатысты төтенше жағдайларға әрекет ету үшін құрылған авиациялық құтқару және өрт сөндіру бөлімінде жұмыс істейді.

Bombardier CRJ-900 ұшағының бортында 100 жолаушы болған. Қазіргі уақытта олардың жағдайы тексеріліп жатыр.

Оқиғадан кейін Нью-Йорктегі Ла-Гуардия әуежайы уақытша жабылды. Рейстер айтарлықтай кешігуі мүмкін.

Айта кетейік, 2009 жылдың қаңтарында Ла-Гуардия әуежайынан ұшып шыққан ұшақ құстарға соғылған. Соның салдарынан әуе кемесінің екі қозғалтқышы да істен шыққан еді. Алайда ұшқыш Чесли Салленбергер ұшақты суға сәтті қондыра алған. Нәтижесінде жолаушылар мен экипаж мүшелерінің ешқайсысы зардап шекпеді. Бұл оқиға «Гудзондағы ғажайып» деген атаумен белгілі.

Оқи отырыңыз: 

• 2026 жылдың соңына дейін тоғыз жаңа ұшақ сатып аламыз
• Ақтаудағы ұшақ апаты: Қазақстан тергеудің соңғы кезеңіне келді
• Ақтөбеден Алматыға шыққан ұшақ бортындағы жолаушы қаза тапты