Неліктен ресейліктер ЖСН-нен айырылды және бұған Freedom-ның қатысы бар ма - ІІМ жауабы

ҚР ІІМ Көші-қон қызметі комитеті елімізде шетелдіктердің жеке сәйкестендіру нөмірлері (ЖСН) жойылатынын растады. Бұл туралы брифингте журналистердің сұрақтарына жауап берген комитет төрағасы Аслан Аталықов мәлімдеді, деп хабарлайды Orda.kz. 

«Егер рәсімдік нормалар бұзылған болса, ЖСН уәкілетті органның өтініші бойынша жойылады. Сондай-ақ, егер, мысалы, басқа елдің азаматы Қазақстаннан кетіп, елде тұрмаса, оны алып тастауға болады», - деп түсіндірді Аталықов.

Оның айтуынша, ЖСН ел аумағында қызмет алу үшін қажет, бірақ егер адам Қазақстанда тұрмаса, онда оған қажеттілік те жоқ. Ол қазір Ішкі істер министрлігіне ЖСН-ді жоюға байланысты шағымдар түсіп, соған байланысты ауқымды тексеру жүргізіліп жатқанын растады.

«ЖСН жөнсіз рәсімделген белгілі бір кезең болды. Қазір бұл жағдайлар бойынша тексеру шаралары жүргізіліп жатыр. Егжей-тегжейлі ақпаратты аша алмаймыз - бұл Қылмыстық іс жүргізу кодексінің 201-бабымен шектелген. Барлығы қылмыстық іс заңнама аясында жүргізіледі», - деп атап өтті ол.

Журналистің әлеуметтік желілердегі Freedom Bank РФ азаматтарына ЖСН-ді күмәнді схемалар арқылы қашықтан рәсімдеуді ұсынған жарнамасы туралы ақпаратқа қатысы бар ма деген сұрағына Аталықов «Іс бойынша нақты айыпталушылар жоқ. Талқылау жүріп жатыр»,  деп екіұшті жауап берді.

Жақында алаяқтық фактісі бойынша «Фридом Финанс» АҚ топ-менеджерлеріне қылмыстық іс қозғалды.