Мердігер Алматыдағы Әлия мен Мәншүк алаңын жөндеу мерзімін өткізіп алған

Сот шешімімен ол мемлекеттік сатып алудың жосықсыз қатысушысы деп танылды, деп хабарлайды Orda.kz Алматы әкімдігіне сілтеме жасап.

Әлия мен Мәншүк саябағындағы жөндеу жұмыстары 2022 жылдың қыркүйегінде басталды. Оны жүзеге асыру бойынша конкурсты «Шах құрылыс компаниясы» ЖШС жеңіп алды. Жоспар бойынша жөндеу жұмыстары 2023 жылдың 31 мамырына дейін аяқталуы тиіс болатын.

Осы уақытта саябақтағы екі субұрқақты қайта жөндеу, асфальтты брусчаткаға ауыстыру, жаңа орындықтар мен қоқыс жәшіктерін орнату, жарықтандыру, суару және су бұру жүйелерін жаңарту жоспарланған болатын.

Алайда, бастапқы аяқталған күннен бір жылға жуық уақыт өтсе де, жөндеу жұмыстары әлі аяқталмаған. Нәтижесінде Алматы әкімдігі мердігерді сотқа берді.

«Алматы қаласының мамандандырылған ауданаралық экономикалық сотының шешімімен «SHAKH Construction Company» ЖШС мердігер ұйымы мемлекеттік сатып алудың жосықсыз қатысушысы деп танылды. Мердігермен келісім-шарт бұзылды, құрылыс жұмыстарын бұзғаны үшін компаниядан 56,1 млн теңге айыппұл өндіріледі» деп хабарлады қала әкімдігі. 

Енді Әлия мен Мәншүк алаңын жөндеуге жаңа байқау жарияланды, ол 24 мамырға дейін өтуі тиіс.