«Мені Үнді құдайы құтқарып қалды»: Қазақстандық биші Гоадағы өрттен қалай аман қалғанын айтып берді

Қазақстандық биші Гоадағы өрттен қалай аман қалғанын айтып, India Today TV арнасына сұхбат берді, деп хабарлайды Orda.kz. 

Кристина Birch by Romeo Lane клубында залда өнер көрсетіп жатқан сәтте өрт тұтанады. 26 адам түтінге тұншығып көз жұмды. Олардың денесі асхана мен баспалдақтан табылған еді.

Кристина не болғанын бірден түсінбегенін, тек шығатын есік іздей бастағанын айтты.

Ол грим бөлмесіне қайта оралмақ болған. Бірақ команданың бір мүшесі: «Ол жаққа барма», — деп тоқтатқан. Кейін биші грим бөлмесінің толығымен өртеніп кеткенін естіген. Ол өз өмірін сақтап қалған бұл адамды «Үнді құдайы» деп атап отыр.

Алдын ала мәлімет бойынша, өрт электр тоғының қысқа тұйықталуынан шыққан. Клуб қауіпсіздік ережелерін сақтамай жұмыс істеген. Қазір полиция бес қызметкерді ұстады. Ал клуб иелеріне іздеу жарияланды. 

Кристина үйіне оралып, қызын құшақтаған сәтте, бұл жағдайдың қаншалықты қауіпті болғанын шын ұққан.

Өрт түн ортасында басталған. Құтқару жұмыстары таңға дейін жалғасқан. Тіпті өрт сөндіру кемелері де келіп жеткен. 

Айта кетейік, Қытайда бұрынғы мемлекеттік компания басшысы өлім жазасына кесілді.