«Мен бәрін көрсетемін, келіңдер»: Депутат Базарбек қызметтік пәтерін «қойылым» дегендерге жауап берді

Мәжіліс депутаты Бақытжан Базарбектің жұбайы Адель Әділова Астанадағы қызметтік пәтерін көрсетіп, көпшіліктің сынына қалды. Желі қолданушылары бейнероликті «қойылым» деп бағаласа, Бақытжан Базарбек Orda.kz тілшісіне бәрін ашық көрсетуге дайын екенін айтты.

Бұған дейін Әділова Instagram  парақшасында күйеуі екеуі тұрып жатқан пәтердің видеосын жариялаған. Ол депутаттар да қарапайым жағдайда өмір сүретінін көрсеткісі келген. Алайда желі қолданушылары видеоға күмәнмен қарап, ескі жиһаз бен тұрмыстық жағдай «арнайы қойылым» болуы мүмкін екенін жазды.

Бақытжан Базарбек Алматыда академқалашықтың айналасындағы құрылысқа қатысты жергілікті тұрғындармен кездесуге келген болатын. Orda.kz тілшісі келіншегінің жариялаған бейнежазбасына қатысты пікірін сұрады. 

«Иә, бұл видеоны әйелім өзі түсірді. “Нұрсаядағы” депутаттық үй көптеген жылдар бойы жаңартылмаған. Ішіндегі жиһаз ескі, шкафтар сынған, бәрі құлауға шақ тұр. Депутаттың үйіне мүлдем ұқсамайды. Әрине, жөндеуге ақша бөлінеді ғой? Ол ақшалар қайда кеткен? Сол себепті әйелім бәрін сол қалпында көрсетті. Видеоны көргендер сенбеді, депутаттар мұндай жерде тұрмайды әрі бұны өтірік деді. Онда журналистер келсін. Мен бәрін көрсетемін. Дені дұрыс бір де бір жиһаз жоқ. Біз ештеңе жасырмаймыз. Бұл кімге ұнайды?», — деді Базарбек.

Осылайша, журналистер депутаттың пәтеріне арнайы шақырту алды. Orda.kz бұл ұсынысты қарастырады.