Мбаппе, Винисиус, Беллингем мен Куртуа Алматының жасыл алаңында

Мбаппе бастаған «Реал» футболшылары Алматы орталық стадионында ашық жаттығуларын жасап кетті. Ал стадион алдына жүздеген жанкүйер жиналды, деп хабарлайды Orda.kz.

Журналистерге көруге мүмкіндік берілген ашық жаттығу Алматының орталық стадионында 29 қыркүйек кешке қарай өтті. Ашық алаңда өткен жаттығуға клубтың барлық ойыншылары қатысты.

 Доп теуіп, жүгіріп, қалжыңдасқан Килиан Мбаппе, Винисиус, Джуд Беллингем, Тибо Куртуа және басқа да ойыншыларды жасыл алаңда бас бапкер Хаби Алонсо басқарып жүр. Ал сыртта жүздеген жанкүйер стадион қоршауынан сығалап, «Реал» ойыншыларын өз көзімен көруге келді.

Еске сала кетейік, «Қайрат» — «Реал Мадрид» матчы 30 қыркүйекте Алматының орталық стадионында  21:45 басталады. Бұл — «Қайраттың» ғана емес, жалпы қазақстандық клубтың Чемпиондар лигасының негізгі кезеңіндегі алғашқы өз алаңындағы ойыны болмақ.