Маргарита Симоньян сүт безінің қатерлі ісігіне шалдықты

Russia Today бас редакторы Маргарита Симоньян «ауыр дертке» шалдыққанын мәлімдеді, деп хабарлайды Orda.kz.

The Moscow Times жазғандай, медианарықтағы Симоньянға жақын дереккөз оның қатерлі дертке шалдыққанын растаған. Сондай-ақ денсаулығына байланысты өте күрделі мәселе бар екені айтылды. Қазір оның жұмысты жалғастыруы не арнадан кетуі талқыланып жатыр.

Ресейлік журналист Владимир Соловьевтің «Россия 1» арнасындағы бағдарламасына қатысқанда  Симоньян өзі диагнозын жария етті. Ол 8 қыркүйекте күрделі ота жасататынын хабарлады.

«Осы аптада дәрігерлер маған ауыр, қорқынышты диагноз қойды. Ертең отаға жатамын», – деді ол.

Симоньян денсаулығының нашарлығына қарамастан, эфирге шығып, майданда жүрген әскерилер мен олардың отбасына қолдау көрсетуді жөн көргенін жеткізді.

Еске салсақ, Маргарита Симоньянның күйеуі, режиссер Тигран Кеосаян тоғыз айдан бері комада жатыр.