Марат Жыланбаев туралы фильм Алматыда көрсетілмейтін болды

Марат Жыланбаев туралы фильм Алматыда көрсетілмейтін болды. Бірде-бір кинотеатр да, зал да келісім бермеді. Келіскендері бірер күннен соң кешірім сұрап, өткізбей тастады. Сонымен қатар оның адвокаты бүгін аштық жариялағанын мәлімдеді, деп хабарлайды Orda.kz. 

Марат Жыланбаев туралы фильмнің көрсетілмейтіні туралы Бақытжан Төреғожина Facebook-парақшасында жазды.

«Біз Қазақстанда көрсете алмағанымыз үшін фильмнің авторы Сәния Тойкеннен кешірім сұраймыз. Бірақ фильмді де, Марат Жыланбаевты да күні бойы үлкен экраннан да, теледидардан да көрсетіп қоятын шақтың туатынына сенемін. Фильмді көрсете алмадық. Бірақ алдағы уақытта бұл ниетімізден қайтпаймыз. Әділ, жақсы заманды күтеміз. Марат Жыланбаевқа бостандық!» деп жазды ол. 

Қазақстан билігі Марат Жыланбаевты «саяси тұтқын» деп есептемейді. Марат Жыланбаев колонияда жиі аштық жариялайды. Оған жүгіруге, сурет салуға тыйым салынған. Адвокаты белсендінің құқығы тапталып жатқанын бірнеше рет айтқан. Бұған дейін Orda.kz өзі түрмеде отырып, түрме басшысынан тайсалмаған Марат Жыланбаевтың хатын ықшамдап оқырман назарына ұсынған болатын.

Марат Жыланбаев — әлемдегі 4 шөлді кесіп өткен алғашқы әрі жалғыз марафоншы. Ол Азиядағы Қарақұм шөлінің 1200 шақырымын 20 күнде кесіп өтсе, дүниежүзіндегі ең үлкен шөл Сахараның 1700 шақырымын 24 күнде жүріп өткен.

Тарихқа енген желаяқ қазақ талай шөлді басып өтіп, 7 рет рекорд жасап, Гиннестің рекордтар кітабына енді. Сондай-ақ, халықаралық «Synergy Global Forum» форумына спикер ретінде қатысқан тұңғыш қазақ осы Марат Жыланбаев. 2023 жылы ғана марафоншы сөз сөйлердің алдында ешқандай дайындық болмағанын, ұйымдастырушылар «өзіңіз жайлы айтсаңыз болды» дегенін хабарлаған болатын. Халықаралық ұйымдар Жыланбаевтың ісін БҰҰ-на жіберіп, Қазақстан үкіметін қысымды тоқтатып, оны босатуға шақырды.

Марат Жыланбаев жайлы үлкен экраннан көрсетілмеген фильмді назарларыңызға ұсынамыз: