Маңғыстау жеріне ұшқышсыз ұшатын дрон құлады

Маңғыстау облысының Қарақия ауданында ұшқышсыз ұшатын дрон табылды, деп хабарлайды Orda.kz.

Дрон елді мекендерден алыс жерден табылған.

«Уәкілетті органдармен бірлесіп, ұшқышсыз ұшу аппаратының бөлшектеріне ұқсас заттың табылуына байланысты тексеру жүргізіп жатырмыз. Залал келген жоқ» — деді Маңғыстау облыстық полиция департаменті.

2025 жылғы ақпаннан бері Батыс Қазақстанда ұшқышсыз ұшақтар және соның бөлшектері бес рет табылды.

Қорғаныс министрінің орынбасары мұны БҚО маңындағы Ресей сынақ полигонымен байланыстырған еді. Алайда Маңғыстау облысы Ресеймен шектеспейді. Онда бұл дрон қайдан келген?

Еске сала кетсек, Батыс Қазақстан облысының Бөкей ордасы ауданындағы Капустин Яр полигонында Ресейдің әскери зымыран сынақтары жүргізіліп жергілікті тұрғындар экологиялық және әлеуметтік қиындықтарға тап болып жатыр. Тілшіміз сол ауданның тұрғынымен сөйлесіп, мән-жайды анықтаған болатын. Ақыры Ресей мен Қазақстан отырған келісімшартта көрсетілген межеден 4 есе көп радиация бар екенін анықтады. Өңірде 112 мүгедек бала бар, 400-дей адам радиация әсерінен мүгедек ретінде тіркелген.