«Майқайың алтын» кен орнында тағы бір адам мерт болды

Павлодар облысындағы «Майқайың алтын» кен орнында жұмысшы техника астына түсіп, көз жұмды, деп хабарлайды Orda.kz. 

Алтын өндіруші кәсіпорын қызметкерлерінің айтуынша, қайғылы оқиға кеше, 14 желтоқсан күні түстен кейін болған. Жұмысшы 140 метр тереңдікте мерт болды. Қаза тапқан жұмысшы 1992 жылы туған моторист екен. Мәліметтерге сүйенсек, жұмыс барысында техникалық қауіпсіздік шаралары бұзылған. Жүк машинасындағы жүргізуші артқа қарай қозғалып, мотористті басып кеткен. 

Оқиға бойынша жүк көлігінің жүргізушісі полиция бөліміне жеткізілді. Қазіргі уақытта тергеу шаралары жүргізіліп жатыр.

Айта кетейік, «Майқайың алтын» кен байыту фабрикасындағы опырылған шахта астына жұмысшылар мінген автобус құлап кеткен еді.