Мәйіт таситын көлік және желіні өшіргіштер: Алматыдағы Назарбаевтар резиденциясы мен «Кеңсай» зиратында не болып жатыр?

Алматыда бүгін таңертеңнен бастап Дулати көшесі жабылды. Тұңғыш президент саябағынан жоғары орналасқан Назарбаевтар әулетінің отбасылық резиденциясына жақын маңда әр 200 метр сайын полиция қызметкерлері тізбектеліп тұр, деп хабарлайды Orda.kz.

Қазір бұл бағытқа көліктердің өтуіне тыйым салынған, түсірілімге де қатаң шектеу қойылған. Кеше басталған күштік құрылымдардың кезекшілігі бүгін күшейе түсті. Форма кигендер саны айтарлықтай артқан. Айналада байланыс нашарлап, кей тұстарда мүлде интернет істемейді. «Орда» журналистері резиденцияға қарай мәйіт таситын көлікке (катафалк) ұқсас көліктің кіргенін байқады.

Біз жақындауға тырысқанымызда, күзетшілер дөрекі жауап қайтарды:

«Не істейсің? Ішінде адам бар. Айта алмаймын».

Сонымен қатар, дәл қазір бірнеше полицей көлігі Алматыдағы танымал тұлғалар жерленген «Кеңсай» зиратының маңында жүр.

Полиция департаменті әзірге ешқандай түсініктеме бермеді, болып жатқан қозғалыстың себебі де айтылмады. Қазір ғана тілшілеріміз мәйіт таситын көлікке ұқсас қара мәшиненің қайта шығып, кетіп қалғанын түсіріп алды. Содан кейін жол қайта ашылып, қала тұрғындары көшемен жүре бастады.

Еске салайық, бірнеше күн бұрын «Орда» Нұрсұлтан Назарбаевтың Алматыға келгенін хабарлаған болатын. Ол «Совминкаға» барып, бірінші жұбайымен қоштасқан. Редакция деректеріне сүйенсек, Сара Назарбаеваның өмір сүруіне сеп болған аппарат сөндірілді. Оның қайтыс болғаны туралы ресми ақпарат әлі жарияланған жоқ.