Lenovo директорының өліміне қатысты күдікті ұсталды

Lenovo компаниясының мемлекеттік құрылымдармен байланыс жөніндегі директоры Ермек Жақыпжанов жоғалып кеткен болатын, оның денесі Алматы облысынан табылды. Полиция бұл іске күдіктіні ұстады, деп хабарлайды Orda.kz.

Полиция департаментінің хабарламасына қарасақ, Ермек Жақыпжановтың зорлық-зомбылық белгілері бар мәйіті 10 қазанда Іле ауданы Өтеген батыр ауылына жақын маңда табылды.

«Полиция адам өлтіру фактісі бойынша қылмыстық іс қозғады. Оперативтік-іздестіру шаралары барысында криминалдық полиция қызметкерлері 24 жастағы күдіктіні Қарағанды облысында «ізін суытпай» анықтап, ұстап, уақытша ұстау изоляторына қамады,  деп хабарлады облыстық полиция департаменті.

42 жастағы Ермек Жақыпжанов 9 қазанда із-түзсіз жоғалғандар қатарына қосылған болатын. Lider.kz еріктілерінің айтуынша, ол таңертең ерте үйінен шығып кеткен және сол күйі оралмаған.