Қызылордада донор қаны құйылған әйелден ВИЧ анықталды: ДСМ пікір білдірді

Қызылорда облыстық перинаталдық орталығында босанғаннан кейін ауыр жағдайда түскен әйелге 12 донордан қан құйылып, бір айдан кейін одан АИТВ (ВИЧ) анықталды. Денсаулық сақтау министрі  Ақмарал Әлназарова осыған қатысты пікір білдірді, деп хабарлайды Orda.kz.

Қызылордада 2024 жылдың 22 қыркүйегінде жедел жәрдеммен перинаталдық орталыққа жеткізілген әйел 23 қыркүйекте түнде табиғи жолмен ұл тапқан. Қанның көп кетуіне байланысты оған 12 донордан қан құйылып, ота жасалған. Әйел 16 қазанда үйіне шығарылған.

 Бір айдан кейін әйелден АИТВ (ВИЧ) анықталған. Оқиға тіркеліп, денсаулық сақтау министрлігіне хабар берілсе де ешқандай шара қолданылмағаны белгілі.

Сондай-ақ, редакцияда ҚР Бас санитарлық дәрігері Сархат Бейсенованың атына жіберілген босанған әйелге АИТВ-инфекциясын жұқтыру туралы облыстық перинаталдық орталықтың анықтамасы бар.

Болған жағдайды Денсаулық сақтау министрі Ақмарал Әлназарова түсіндірді. Ол қазіргі уақытта тергеу жүргізіліп жатқанын айтты.

«Бұл жағдай Денсаулық сақтау министрлігінің бақылауында. Қазір тергеу жүргізіліп жатыр, оның қорытындысы бойынша тиісті шаралар қабылданады», — деді министр Мәжіліс дәлізінде. 

Редакция Қызылорда перинаталдық орталығына да сауал жолдады.