Қызылорда-Жезқазған жолын жөндеу жұмыстары қайта жанданды

Қызылорда облысында 40 жылдан бері жөндеу көрмеген республикалық маңызы бар Қызылорда – Жезқазған жолын қалпына келтіру жұмыстары қайта жанданды, деп хабарлайды Orda.kz.

«ҚазАвтоЖол» АҚ хабарлағандай, республикалық маңызы бар «Қызылорда-Жезқазған» тас жолының жалпы ұзындығы 412 шақырым. Жолдың жартысы Қызылорда облысына, екіншісі Ұлытау өңіріне тиесілі. Оның үстіне тас жолдағы соңғы құрылыс жұмыстары 40 жылдан астам уақыт бұрын жүргізілген.

Қызылорда облысындағы тас жолды қайта жаңғырту жұмыстары алты учаскеге бөлінеді. Оның бесеуі бойынша жұмыс басталып кеткен.

«Бүгінде жол қызметкерлері 24 шақырымнан 127 шақырымға дейінгі учаскелерде топырақтың құнарлы қабатын алып тастау, айналма жолдарды салу, жер жабындысын тегістеу және қолданыстағы жол төсемдерін бөлшектеу жұмыстарын жүргізуде және 127 шақырымнан 216 шақырымға дейінгі учаскеде айналма жолдармен жүруді қамтамасыз етуде. Ондағы жұмыс 2022 жылы кезең-кезеңімен басталды. Қызылорда облысында жобаның толық аяқталуы 2025 жылдың соңына жоспарланған» деді «ҚазАвтоЖол».

Жаңа жолдың жаңа асфальтбетон бетінде көлік қозғалысы екі жолақты болады, су өткізгіш құбырлар мен мал өткелдері орнатылады.

Ұлытау өңіріндегі бұл жолды қайта жөндеу жұмыстары 2024 жылдың екінші жартысында басталады.

Сондай-ақ ұйым Қызылорда облысындағы тас жолды жөндеуге 517 адам жұмысқа қабылданғанын, оның 459-ы жергілікті тұрғындар екенін хабарлады.