Қырғызстанда селден қаза тапқан балалардың денесі Өскеменге жеткізілді

Қырғыстанда селден қаза тапқан қазақстандық балалардың денесі анайы ұшақпен Өскеменге жеткізілді.

Бұл туралы Шығыс Қазақстан облысының әкімдігі хабарлады.

Қайғылы оқиға болған күні екі ұл мен екі қыз анасымен бірге Ош облысындағы туыстарына қонаққа барған. Туристік аймақта болған сел қазақстандықтардың өмірін қиды. Қаза болғандардың туыстарына көмек көрсету үшін Шығыс Қазақстан облысы әкімдігінде жедел штаб құрылып, оның құрамына облыстағы барлық қызметтердің мамандары кірді.

«Облыс әкімі Ермек Көшербаев облыс басшылығы тарапынан барлық қажетті қолдау көрсетілетініне сендірді. Балаларды жерлеу рәсімін ұйымдастыру мен өткізуді жергілікті атқарушы органдар мен «Халифа Алтай» мешіті өз мойнына алды. Өңірдегі кәсіпорындар мен кәсіпкерлер де отбасыларға көмек көрсетуге дайын екендіктерін білдірді», - деп хабарлады әкімдік.

28 маусымда Ош облысының Ноқат ауданында жаңбыр жауып, селге ұласты. Қырғыз билігі төтенше жағдай жариялады. Табиғат апатынан кем дегенде тоғыз адам қаза тапты, оның төртеуі Қазақстан азаматы.