Қырғызстанда есірткіні заңдастыру ұсынылды

Қырғызстанда депутат Дастан Бекешев есірткінің жеңіл түрін заңдастыруды ұсынды, деп хабарлайды Orda.kz.

Жогорку Кенеш отырысында Дастан Бекешев есірткіге басқа көзқараспен қарауды ұсынды. Оның ойынша адам – әлсіз жаратылыс, сондықтан алкаголь тұтынса, демек есірткіні де қолдана алады. 

«Біз ауыр зұлымдық пен кішігірім зұлымдықты айыра білуіміз керек. Мысалы синтетикалық есірткіні тұтынған адам – ауыр зұлымдық шеңберінде жүр. Мүмкін кәмелет жасқа толған азаматтар үшін есірткінің жеңіл түріне рұқсат берерміз?», – деп ұсынды депутат. 

Оның айтуынша, қарасора сынды табиғи есірткілерді құқық қорғау органдары жойып жіберетіндіктен, жастар арзан синтетикалық есірткілерді сатып алады. Бекешев бұл тақырыпты бірінші рет көтеріп тұрған жоқ. Осыдан 5 жыл бұрын ол  «Манас» авиабазасында ойын аймағын құруды және сол шекарада есірткі сату мен қолдануды заңдастыру жөнінде ұсыныс тастаған болатын.

Айта кетейік, 2014-2017 жылдары Қырғызстан Ұлттық банкінің басшысы болған Толкунбек Абдыгулов та осыған ұқсас ұсыныс жасаған болатын. Ол туризмді дамыту үшін марихуана сатуға рұқсат беру керектігін айтқан еді.