Қырғыз-Өзбек шекарасындағы атыс: Екі қырғыз азаматы мерт болды

Өзбек шекарашылары Қырғызстанның екі азаматын шекарада атып өлтірді, деп хабарлайды Orda.kz.

AKIPress агенттігінің мәліметінше, 25 тамыз күні құқық қорғау органдарына Чаткал ауданының Айғыр-Жал ауылында тұратын екі азаматтың жоғалып кеткені туралы арыз түскен.

Өзбекстан тарапының мәліметінше, Қырғызстанның екі азаматы шекара талабына бағынбай, тоқтау бұйырығына құлақ аспай жасырынуға тырысқан. Осыдан кейін шекарашылар оларға оқ атқан, екеуіне де оқ тиіп, оқиға орнында көз жұмды.

Ал 31 тамыз күні із-түзсіз жоғалған азаматтардың туыстары Өзбекстанға барып, қаза тапқандардың мәйіттерін таныған. 1 қыркүйекте екі азаматтың денесін «Баймақ» өткізу бекеті арқылы Қырғызстан тарапына қайтарылды.

Қырғызстан мен Өзбекстанның шекара қызметінің басшылары бірлескен тергеу жүргізуге келіскен. Сонымен қатар, Өзбекстан қаза тапқандарға тиесілі мүлікті — үш жылқы мен бір киіз үйді қайтаруға дайын екенін мәлімдеді.

«Шекара қызметі болған жағдайға байланысты алаңдаушылық білдіреді. Қаза тапқан азаматтар бойынша жан-жақты тергеу жүргізіліп жатыр, оның нәтижесі жұртшылыққа жария етіледі», деп мәлімдеді Қырғызстанның ұлттық қауіпсіздік мемлекеттік комитеті.

Еске сала кетсек, Қырғызстанда қырғыз тілін білмейтін азаматтарға айыппұл салу мәселесі бойынша заңнамаға өзгерістер енгізілді.