«Қылмыс әлемінің серкесіне қаржы бөлді»: Амандық Баталовтың күйеу баласын Қырғызстанда іздеп жатыр

Қырғызстан Ұлттық қауіпсіздік мемлекеттік комитетінің мәліметінше, Қазақстандық кәсіпкер Ерқанат Жұмабеков қылмыстық топқа қаржы бөлді деген күдікке ілінді. Тергеу нұсқасы бойынша, ол кезінде атышулы «заңдағы ұры» Камчы Көлбаев (Камчы Асанбек) басқарған ұйымдасқан қылмыстық топпен байланыс орнатқан, деп хабарлайды Orda.kz.

Қырғызстанның арнайы қызметі таратқан ақпаратқа сай, Жұмабеков Көлбаевпен тығыз жеке және іскерлік қарым-қатынаста болған. Ол Көлбаевтың бопсалау, рэкет және кәсіпкерлерден заңсыз ақша жинаумен айналысатынын біле тұра, өз жобаларын ТМД елдерінде қорғау және жүргізу үшін одан қамқорлық іздеген.

Кәсіпкер мен қылмыс серкесінің Ыстықкөл жағасындағы «Барыс» демалыс орнында бірнеше рет кездескені, сондай-ақ Жұмабеков Алматыға келген Көлбаевтың туыстарына көмек көрсеткені айтылып отыр. Қазір Ерқанат Жұмабековке халықаралық іздеу жарияланды.

Анықтама: Ерқанат Жұмабеков — Қазақстандағы ең көне кәсіпорындардың бірі саналатын «Айдабол спирт зауыты» АҚ басқарма төрағасы.1908 жылы Айдабол ауылында негізі қаланған зауыт қазіргі таңда әртүрлі сорттағы этил спиртін шығарады.

Айта кетейік, биыл қаңтар айында Қырғызстан президенті Садыр Жапаров Камчы Көлбаевтың «ел мүддесі үшін жойылғанын» мәлімдеген еді. Оның айтуынша, қазір Қырғызстанда ұйымдасқан қылмыстық топ жоқ.

Еске сала кетейік, Қазақстанда резонанс тудырған Талғардағы 16 жасар Шерзат Полаттың өліміне қатысты сот отырысы өтіп жатыр. Бұл істі тергеген билік өкілдері Қазақстанда да ұйымдасқан қылмыстық топтардың жоқ екенін айтқан болатын.