Құрылысы 10-12 жылға созылатын АЭС несиеге салынбақ

Қазақстандағы АЭС құрылысы шамамен 10–12 жылға созылады. Құрылыс шамамен 2035–2036 жылдары аяқталуы мүмкін. Оған қоса АЭС құрылысына Ресей жеңілдетілген несие ұсынады, деп хабарлайды Orda.kz.

Бұл туралы Атом энергиясы агенттігі мәлімдеді.

Қазақстан мен Ресей алғашқы атом электр станциясының (АЭС) құрылысы бойынша келісімге келді. Атап айтқанда, Мәскеу жобаны жүзеге асыру үшін Қазақстанға жеңілдетілген шарттармен экспорттық қаржыландыру ұсынады.

Сонымен қатар, агенттіктің мәліметінше, құрылысқа отандық материалдарды пайдалану және арнайы даярлықтан өткен жергілікті мамандарды тарту көзделіп отыр.

«Қажетті құрылыс материалдары мен мамандар Қазақстанда бар кезде, оларды Ресейден әкелуге еш негіз жоқ. Сондай-ақ, «Росатом» ұсынған бастапқы баға жария етілмейді, себебі бұл коммерциялық құпия», — деп түсіндірді агенттік.

Жобаның нақты құны әзірге белгісіз. Құрылыс барысына ауа райы, сейсмикалық жағдайлар, қосымша жабдықтардың қажеттілігі мен жергілікті өндірістің үлесі әсер етуі мүмкін. Қорытынды қаражат жобалау мен сараптамадан кейін белгілі болады.