Құдайдан қалауды ақшаға сұрау мүмкін бе?: Блогер Меккеде оқыған дұғасын сатты

Әлеуметтік желіде тараған бейнежазбада блогер Аягөз Асқарова Меккеде Қағбаны айналған сәтінде оқыған «қасиетті дұғасын» 1000 теңгеден сатқан, деп хабарлайды Orda.kz.

Асқарова өз дұғасының көмегін көрген оқырмандар арнайы топқа жазылып, ақысын төлеп, дұғаны сатып алғанын айтты. Блогер тіркелгендерге 24 сағаттық қолжетімділік беріп, дұғаны оқу тәртібін үйреткен.

Бұл жайтқа қатысты әлеуметтік желі қолданушылары екіге бөлінді. Бір бөлігі құран аяттары мен дұғаларды саудаға салу дұрыс емес деген пікір білдірді.

Қазақстан мұсылмандары діни басқармасы да оқиғаға байланысты түсініктеме берді.

«Дұға – пенде мен Жаратушы арасындағы рухани байланыс. Ол ешқашан саудаға салынбайды. Дұғаны сатып алу немесе сату – шариғатқа қайшы. Мұндай әрекет халықты шатастырып, діннің асыл құндылықтарын коммерцияға айналдырады. Әрбір мұсылман дұғаны ықыласпен өзі жасай алады, бұл үшін ақша төлеудің қажеті жоқ», – деді мүфтият өкілдері.