Қуандық Бишімбаев балаларына алимент төлеуден бас тартты

Қуандық Бишімбаевтың экс-әйелі Назым Қаһарман балаларының алимент алмайтынын мәлімдеді, деп хабарлайды Orda.kz.

Өзі жайлы қауесеттерге нүкте қою үшін Назым Қаһарман YouTube арнасына бейнеролик жариялады.  Бейнежазбада Назым бір жарым жылдың ішінде балалары Бишімбаевтардан көк тиын ала алмағанын айтты.

«Былтыр балалардың демалысына да, психологтарына да ақы төленген жоқ. Барлық түбіртектерді жолдадым. Бір жарым жылдың ішінде қомақты қаражат жиналды. Бірақ адвокатқа жібергеніме қарамастан, оны елемей қойды», – деді Назым.

Сонымен қатар, 2020 жылы экс-күйеуі Бишімбаевпен ажырасқанда келісілген алиментті де еске салуға мәжбүр еді.

«Маған үнемі еске салып отыруға тура келеді. Адвокат Баянға үнемі жазамын. Мысалы, бүгін – 28 наурыз. Осы күнге дейін наурыз айының алименті әлі түскен жоқ. Тұрақты түрде өткен жылдың қараша-желтоқсан айларында ғана аудара бастады», – деді Назым.

Өткен жылдың қараша айында Астанада Қуандық Бишімбаевты ата-ана құқығынан айыру ісі бойынша апелляциялық іс қаралды. Бұл талапты оның бұрынғы жұбайы Назым Қаһарман қойған. Сол кезде Қуандық Бишімбаев балаларының тегін өзгертуге қарсы емес екенін айтты.