Қостанайда көліктен құлап түскен зейнеткерді артта келе жатқан көлік басып кетті

Қостанай қаласында жантүршігерлік жол апаты болды. Алтынсарин мен Гоголь көшелерінің қиылысында бір әйелді көлік басып кетті, деп хабарлайды Orda.kz. 

Көше қиылысында бұрылып жатқан таксидің есігі кенеттен ашылып, ішінен бір адам жолға құлап түсті. Дәл сол сәтте таксидің артынан келе жатқан көліктің жүргізушісі жолда жатқан адамды байқамай басып кеткен. 

Көліктің астында қалған 65 жастағы зейнеткер әйел екені белгілі болды. Кейбір дереккөздердің мәліметінше, зейнеткер көліктің есігін өзі ашқан болуы мүмкін. Ол аман қалды, бірақ ауыр жарақат алған. 

Бұл дерек бойынша әкімшілік іс қозғалды.

Айта кетейік, кеше, 1 қазан күні Қарағандыда кәріз құбырын жөндемек болған екі жұмысшы топырақтың астында қалып, көз жұмған еді.