Көші-қон саясаты: Тоқаев Қауіпсіздік Кеңесі отырысын өткізді

Қасым-Жомарт Тоқаевтың төрағалығымен Қауіпсіздік Кеңесінің кезекті отырысы өтті, деп хабарлайды Orda.kz.

Жиында ішкі және сыртқы көші-қон саласындағы негізгі үрдістер талқыланды. Вице-премьер Ермек Көшербаев, сондай-ақ ішкі істер, цифрлық даму, еңбек министрлері баяндама оқыды.

«Мемлекет басшысы көші-қон саясатын іске асыруда геосаяси факторлар мен қауіп-қатерлерді, демографиялық болжамдарды және халықтың көшу себептерін ескеру маңызды екенін атап өтті. Президент заңсыз көші-қонның алдын алу үшін бақылауды күшейту, сонымен қатар елдің адами капиталын арттыруды ынталандыру қажеттігін айтты»,  деп хабарлады Ақорда.

Отырыс қорытындысы бойынша Үкіметке бірқатар нақты тапсырма берілді. Атап айтқанда, мемлекеттік органдардың функционалдық міндеттерін талдап, қайта қарау және көші-қон саласындағы барлық ақпараттық жүйелерді біріктіруді жеделдету тапсырылды.

Еске сала кетсек, Түркістан облысы Төрткүл ауылында 16 жастағы қызды мигранттар зорлап, аяусыз өлтіріп кеткен еді. Ал полицияның ресми ақпаратына қарасақ, бір күдікті ұсталған. Қыздың мәйіті 6 маусым күні таңертең табылған. Толығырақ мақаламыздан оқыңыздар.