«Қосанов халық алдына шықсын!»: Әскерде қаза тапқан сарбаздардың аналары талаптарын айтты

10 қарашада таңертең Астанадағы Үкімет үйінің алдында әскерде қаза тапқан сарбаздардың аналары жиналды, деп хабарлайды Orda.kz.

Олар ғимарат ішіне кіріп, журналистерге наразылыққа шығу себебін түсіндірді.

«Олар реформа қабылдай алмайды. Ештеңе шеше алмады. Үш жарым жыл ішінде ештеңе шешпеді. Мен олардың барлығын жатқа білемін. Қосанов, Жайсаңбаев. Олар халықтың алдына шықсын. Жайсаңбаев, Қосанов, егер сіздер адал жұмыс істесеңіздер, халықтың алдына шығыңыздар!», – деді наразылыққа шыққан Гүлмира Мұқажанова.

Бір ер адам әйелдердің жанына келіп, жиналғандардан үйге қайтуды сұрады.

«Бұл әрекеттерді тоқтатуды сұраймыз. Бас тартқан жағдайда әкімшілік жауапкершілік қарастырылған. Тарқаңыздар», – деді ол.

Әйелдер президенттің әкімшілік аппаратымен кездесуді талап етті.

Кейін наразы аналарды Ұлттық ұлан Бас қолбасшысының тәрбие және әлеуметтік-құқықтық жұмыс жөніндегі орынбасары генерал Қайсар Үмбетов пен Қорғаныс министрлігінің өкілдері қабылдады. Алайда марқұм сарбаздардың аналары дәл осы адамдармен үш жылдан астам уақыттан бері кездесіп жүргенін айтты.

Әйелдер қорғаныс министрі Дәурен Қосанов пен өтініштердің қаралуын бақылау бөлімінің меңгерушісі Қанатбек Жайсаңбаевтың келгенін талап етті.

Айта кетейік, президент Қасым-Жомарт Тоқаев 11-12 қарашада Ресей Федерациясына мемлекеттік сапармен барады.