«Көрші елдер де қатыса алады»: Қырғызстанда жаңа әнұранға байқау жарияланды

07 ақпан 2025 18:35 Альфия Адамбек

Фото: Facebook.com/ Kyrgyzpresident

Қырғызстанда жаңа әнұранға байқау жарияланды. Байқауға Қырғызстаннан бөлек, көрші елдің сазгерлері, ақындары, музыканттары қатыса алады, деп хабарлайды Orda.kz.

Бұған дейін қырғыздар әнұранды өзгерту туралы шешім қабылдағанын хабарлаған едік. Президент Садыр Жапаров әнұранның 33 жыл бұрын жазылғанын және жаңартуды қажет ететінін айтқан.

«Біз мемлекет ретінде толығымен қалыптастық. Әлемге танылдық. 100 жыл өтсе де, қалай тәуелсіздікке жеткенімізді жырлай береміз бе? Неге біз халқымыздың бес мың жылдық тарихы бар екенін айтып, болашақ ұрпаққа арнап әнұран жазбаймыз? Әрине, қазіргі әнұран да ұмытылмайды. Ол тарихта республикамыздың тұңғыш әнұраны ретінде қалады», - деді Садыр Жапаров.

Қырғыз Республикасының мемлекеттік әнұраны 1992 жылы 18 желтоқсанда Қырғыз Республикасы Жоғарғы Кеңестің қаулысымен бекітілген.

Бастапқыда ол үш шумақ пен қайырмадан тұрды, бірақ 2012 жылғы 27 желтоқсандағы Жоғарғы Кеңестің қаулысымен екінші шумақ алынып тасталды.

Қырғызстанның мәдениет министрлігі конкурс жеңімпаздарына дипломдар мен ақшалай сыйлықтар береді. Бірінші орынға – 1,5 миллион сом, екінші орынға – 1 миллион сом, үшінші орын – 500 мың сом бермекші.

Жаңа әнұран осы жылдың сәуіріне дейін қабылдануы тиіс.

Жаңалықтар

барлық жаңалықтар