Конституция күніне орай Көктөбе мұнарасы жарықтандырылады

Алматы әкімдігі Конституция күніне орай жасалған мерекелік бағдарламасымен бөлісті, деп хабарлайды Orda.kz.

Сағат 19:00-де Республика сарайының алдындағы Абай алаңында «Ата заң – Тәуелсіздік тірегі» атты үлкен концерт өтеді. Қала тұрғындары мен қонақтары ашық аспан астында үлкен экранда Конституция қабылданған сәттен бастап тарихи кадрларды тамашалаумен қатар, қазақ эстрадасы әртістерінің орындауындағы танымал әндерді тыңдай алады.

Концертте Роза Рымбаева, Бүркіт пен Айша, ADAM, TURAR, Қуандық Рахым, Ғаділбек Жанай, Диана Исмаил, Төлеген Рахымбаев, JCS, NAZAR топтары және т.б. өнер көрсетеді.

Сонымен қатар, бағдарламада «Hassak» этно-фольклор тобы мен «Алдаспан» тобының аспаптық музыкаға негізделген қойылымы көрсетіледі деп күтілуде.

«Концерттің шарықтау шегі 21:00-де «Көктөбе» телемұнарасының сәулеттік-көркемдік жарығын салтанатты түрде қосуға ұласады», деп хабарлады қала әкімдігі.