Көлсай маңындағы жол апатынан флиппиндік турист қаза тапты

«Көлсай көлдері» ұлттық саябағында жол апаты болып, бір турист қаза тапты, деп хабарлайды Orda.kz.

Бұл туралы ақпаратты бізге гид хабарлап, куәгерлер түсірген бейнежазбаны редакцияға жіберді. Оның айтуынша, қонақтарды Алматылық облыстың Кеген ауданына қарасты Саты ауылының тұрғыны тасымалдап жүрген.

«Ол туристерді тасымалдап, қызмет көрсететін. Сол күні филиппиндік туристерді Қайыңды көліне қарай апара жатқан. Көлік аударылып, екі турист қаза болды. Жүргізуші жылдамдықты асырып, қарсы бағыттан жүк көлігі шыққанда рөлге ие бола алмай қалған», – деді гид. 

Гид берген мәліметке сүйенсек, апат 30 қарашада болған. Біздің ресми сауалымызға Алматы облыстық полиция департаменті жауап берді. Олар бір адамның қаза болғанын нақтылады.

«Кеген ауданында болған жол-көлік оқиғасынан кейін қылмыстық іс тіркелді. Алдын ала дерек бойынша, Toyota Sequoia жүргізушісі рөлге ие бола алмай, көлік аударылған. Оқиға орнында бір жолаушы көз жұмды. Тағы бесеуі түрлі жарақатпен аудандық ауруханаға жеткізілді», – деп хабарлады департамент. 

Жүргізуші қазір уақытша ұстау изоляторына қамалды. Тергеу жүріп жатыр.

Бұған дейін де ауыр апат тіркеліп, жеті адам қаза болған еді. Алматы – Бішкек тас жолындағы сол апатта спортшылардың қаза тапқаны белгілі болған еді.