Көк түтінге оранған Атырау: Халық үш күн бойы тұншығып отыр

Атырау қаласы үш күн қатарынан қою түтіннің астында қалды. Қала аумағын көмкерген ыс пен күйік иісі ауада анық сезіледі. Жағдай ушығып тұр. Экологтардың мәліметінше, ауадағы зиянды заттардың концентрациясы қалыпты деңгейден 11 есе жоғары, деп жазады Orda.kz.

Қолайсыз ахуал «Ақжайық» мемлекеттік табиғи резерваты аумағындағы қамыс өртімен байланысты. Өрт ауыздықталғанымен, жанып жатқан қамыс шоғы әлі сөнген жоқ.

«Тұншығып отырмыз, басымыз ауырады, балалар жөтеліп жатыр. Бұл жай ғана жайсыздық емес, денсаулығымызға тікелей қауіп. Ең сорақысы — ешкім бұл қашан бітетінін түсіндірмейді», — дейді Атырау тұрғыны Айгүл Серікова.

Күйік иісін ұзақ уақыт бойы жұту бас ауруын, жүрек айнуды, тыныс жолдарының тітіркенуін тудыруы мүмкін. Ал егер ауадағы уытты заттар мөлшері шамадан тыс артса, адам тіпті есінен танып қалуы ықтимал.

Әлеуметтік желі қолданушылары жергілікті билікті төтенше жағдай жариялауға, мектептер мен балабақшаларды уақытша жабуға шақырып жатыр. Алайда әзірге дәрігерлер мен төтенше жағдайлар қызметі тек тұрғындарға мүмкіндігінше сыртқа шықпауға кеңес беріп отыр.