Кінәсін мойындамаған Перизат Қайраттың анасы үйқамаққа қамалды

3,5 млрд теңге жымқырды деп айыпталған Перизат Қайраттың анасына қатысты сот бұлтартпау шарасын белгіледі, деп хабарлайды Orda.kz.

Ол алаяқтық және қылмыстық жолмен табылған қаражатты заңдастыру баптары бойынша күдікке ілінген. Сенат дәлізінде Қаржылық мониторинг агенттігі төрағасының орынбасары Жеңіс Елемесов Перизаттың анасының үйқамаққа алынғанын мәлімдеді.

Ал Перизат Қайраттың ісі бойынша тергеу аяқталды. Жақында іс сотқа өтеді. Жәбірленушілердің шығыны 3,5 миллиард теңге деп есептелді. Айыпталушы өз кінәсін мойындамады, сонымен қатар тергеумен ынтымақтаспай, сұрақтарға жауап беруден бас тартты. Оның бірнеше рет адвокат ауыстырғаны белгілі болды.

«Күдіктінің жауап беруден бас тартуға құқығы бар. Ол осы құқығын пайдаланып, жауап беруден бас тартты. Оның адвокаттары бар. Бұған дейінгі адвокаттары ауысып, қазір басқа жұмыс істеп жатыр», – деді Елемесов сенат дәлізінде.

Тергеу материалдары 100-ден астам томға жетті, әрқайсысы 118 беттен тұрады. Сонымен қатар, айыптауды растайтын заттай дәлелдер де бар.