«Қазтелеком» Орталық Азиядағы екінші ірі AI-кластерді іске қосты

«Қазтелеком» АҚ Орталық Азиядағы екінші ірі жоғары өнімді жасанды интеллект кластері — AI-Farabium жобасының іске қосылғанын жариялады, деп хабарлайды Orda.kz.       

Кластер ұлы ойшыл және математик Әбу Насыр әл-Фарабидің құрметіне аталған.

AI-Farabium-ның ресми таныстырылымы 2025 жылы өткен Digital Bridge халықаралық технологиялық форумында, Қазақстан Президенті Қасым-Жомарт Тоқаевтың қатысуымен өтті. Бұл оқиға елдің ұлттық цифрлық экожүйесін дамытудағы маңызды кезең ретінде бағаланып отыр. Сонымен қатар, бұл — жасанды интеллект үшін егемен инфрақұрылым құру жолындағы стратегиялық қадам.

Мемлекет басшысы бұған дейін жасанды интеллект саласын дамытуға арналған кеңесте елді Еуразиядағы цифрлық хабқа айналдыру жөнінде амбициялы мақсат қойған болатын. AI-Farabium кластері осы жолдағы маңызды бастамалардың бірі болмақ.

AI-Farabium келесі салаларда кең ауқымды қолдануға мүмкіндік береді:

 • Үлкен тілдік модельдер мен генеративті жасанды интеллектті оқыту;

 • Өнеркәсіптік шешімдер әзірлеу;

 • Медициналық деректерді талдау;

 • «Ақылды қала» технологияларын енгізу;

 • Автономды көлік жүйелерін дамыту;

 • Контент жасау, сөйлеу мен бейнені тану.

Жоба — Қазақстанның әлемдік деңгейдегі тәуелсіз жасанды интеллект инфрақұрылымын құру жолындағы алғашқы әрі маңызды қадамы ретінде қарастырылады.

Жақында «Самұрық-Қазына» ұлттық әл-ауқат қоры алғаш рет жасанды интеллект негізінде әзірленген SKAI (Samruk-Kazyna Artificial Intelligence) жүйесін директорлар кеңесінің тәуелсіз мүшесі ретінде таныстырды.