«ҚазМұнайГаздың» қолдауымен Арал теңізінің құрғаған табанына 4,4 миллионнан астам сексеуіл көшеттері отырғызылады.

5 сәуірде «ҚазМұнайГаз» (ҚМГ) ҰК» АҚ басқарма төрағасы Мағзұм Мырзағалиев, Қызылорда облысының әкімі Нұрлыбек Нәлібаев және Экология және табиғи ресурстар вице-министрі Нұркен Шарбиев Арал теңізінің құрғаған табанына сексеуіл егу жұмыстарына қатысты. Бұл туралы Orda.kz хабарлайды.

Бұл жоба Мемлекет басшысы Қасым-Жомарт Тоқаевтың елді жасылдандыру жөніндегі экологиялық бастамасын қолдау мақсатында жүзеге асырылуда.

«Сексеуіл Қазақстанның рәміздерінің бірі болып саналады. Біздің халқымыз үшін бұл өсімдік ежелден кедергілерді жеңу қабілетін және өмірдің қайта жандануын білдіреді. Біз өзіміз қызмет ететін аймақтарды көгалдандыруға белсене қатысамыз. ҚМГ Арал теңізінің таяз түбіндегі 15 мың гектар алқапқа 4 миллионнан астам сексеуіл көшеттерін отырғызуға міндеттеме алды. Осылайша, біздің компания болашақ ұрпақ үшін жасыл экономика мен табиғатты қорғауға қосқан үлесін нығайтады, сонымен қатар тұрақты даму қағидаттарына адал екенімізді көрсетеді», - деді Мағзұм Мырзағалиев. 

Мұндай кең көлемде сексеуіл көшеттерін отырғызу Арал теңізінің құрғауына байланысты жыл сайын пайда болатын шаң-тозаң мен тұздан қорғануға, шөлейттенуді бәсеңдетуге және өңірдің өсімдіктері мен жануарлар дүниесін сақтауға мүмкіндік береді. Осылайша, «ҚазМұнайГаз» еліміздің экономикалық дамуына қосқан үлесін арттырып қана қоймай, әлеуметтік сала мен экологиялық жобаларды қолдау ауқымын арттыруда.

Сексеуіл оның айналасында төрт тоннаға дейін құм жиналатын шағыл түзетінімен ерекше. Жетінші жылы 15 мың гектар алқаптағы сексеуіл егістері ауаға 15 мың тоннадан астам тұз, шаң мен құмның шығуын болдырмайды. 

Сексеуіл егу өңірдің мал шаруашылығына да пайдасын тигізеді, өйткені сексеуіл ормандарындағы шөп жақсы өсіп, дамып, малды жақсы азықпен қамтамасыз етеді.

Жобаның орындаушысы – Қазақстан Республикасы Экология және табиғи ресурстар министрлігі Орман шаруашылығы және жануарлар дүниесі комитетінің «Республикалық орман селекциясы және тұқым шаруашылығы орталығы» республикалық мемлекеттік қазыналық кәсіпорны.

Айта кету керек, «ҚазМұнайГаз» тобы республика бойынша тұрақты түрде ағаш отырғызады. Осылайша, тек 2023 жылы ҚМГ 40 мыңға жуық жасыл желек отырғызуды қамтамасыз етеді.