«ҚазМұнайГаз» 1,5 миллиард теңгеге қап пен пленка шығаратын тиімсіз кәсіпорынды сатып алды

«ҚазМұнайГаз» ұлттық компаниясы тиімсіз полипропилен қаптар мен пленка өндіруші «Polymer Production» ЖШС-ін 1,5 миллиард теңгеге сатып алды.

 Бұл туралы ҚазМұнайГаздың 2024 жылдың алты айындағы аралық шоғырландырылған қаржылық есептілігінде (аудиттелмеген) белгілі болды. ҚМГ есебіне сәйкес, мәміле 2024 жылдың қаңтарында аяқталды.

Құжатта 2023 жылдың желтоқсан айында ҚазМұнайГаз компаниясы «Самұрық-Қазына» қорының еншілес ұйымы – «Самұрық-Қазына Өндеу» ЖШС-нен және үшінші тұлғадан «ХимПаркТараз» АҚ-дан 99,9% және «Polymer Production» ЖШС 0,1% қатысу үлесін сатып алғаны нақтыланады. Мәміле сомасы 1,52 млрд теңге болды, ол 2024 жылдың қаңтарында төленген.

Осылайша «ҚазМұнайГаз» «Полимерді» бақылауға алып, оны еншілес компания ретінде мойындады.

2023 жылдың 30 маусымында аяқталған алты ай ішінде «Полимердің» бұрынғы акционері «Самұрық-Қазына Өндеу» ЖШС кәсіпорынның жарғылық капиталына 13,8 млрд теңге көлемінде салым қосқаны хабарланды.

«Полимер Продакшн» қаржылық есебіне сәйкес, 2022 жылы ЖШС 10,7 млрд теңгеден астам шығын тіркеді. Бұл ретте оның жабылмаған жинақталған шығыны осы күнге 27,5 млрд теңгеге жетті.

«Polymer Production» ЖШС 2012 жылы Атырауда құрылды.  Ол өзін Қазақстандағы және Орталық Азиядағы полипропиленді қаптар мен биаксиалды бағыттағы полипропилен пленкаларын шығаратын алғашқы ірі кәсіпорын ретінде көрсетеді.