Қазақстандықтардың Украинадағы соғысқа аттануы: Бас прокуратура не дейді?

Қадағалаушы орган өкілі қазақстандықтарды соғысқа тарту туралы Orda.kz материалына пікір білдірді.

Еске салайық, бұған дейін біз «ВКонтакте» әлеуметтік желісінде қазақстандықтарды Ресей әскерінің қатарына қосылып, Украинадағы соғысқа қатысуға үгіттейтін жарнама туралы зерттеу жарияланды. Мұндай хабарламаларда ресейлік әскери киім киген сарбаздардың фотосуреттері пайдаланылған.

Сенат дәлізінде Бас прокурордың орынбасары Ғалымжан Қойгелдиев бұл мәселемен уәкілетті органдар айналысып жатқанын айтты. Алайда ол жарнаманы өзі әлі көрмегенін мәлімдеді.

«Белгілі бір ақпараттар пайда болысымен, олар тексеріліп, содан кейін ғана шаралар қабылданады. Мен әлеуметтік желілерден ондай хабарламаларды байқамадым, бірақ қарап шығайық. Әлеуметтік желілеріміз тұрақты бақылауда. Заңға қайшы жағдайлар анықталған сәтте тиісті шара қабылдаймыз», – деді Қойгелдиев.

Алайда, қазіргі уақытта жарнама әлі де қолжетімді. Осыған орай журналистер прокуратураның бұл мәселеге байланысты нақты әрекет етіп жатқанын сұрады.

«Айтамын ғой, қарап көрейік», – деп қысқаша жауап берді ол.

Сондай-ақ, Қойгелдиевке қазақстандықтарды Ресейге жұмысқа шақырып, кейін алдап қамауға алып, соғысқа қатысу туралы келісімшартқа қол қоюға мәжбүрлейді деген қауесеттер туралы сұрақ қойылды.

«Бұл мәліметті нақтылап көреміз. Уақыт беріңіздер, бұл мәселені міндетті түрде қарастырамыз. Шетелде жүрген азаматтарымыздың құқықтарын қорғау – Сыртқы істер министрлігінің құзырында. Олардың бұл жағдайдан хабардар екеніне және тиісті шараларды қолға алып жатқанына сенімдімін. Бірақ құқық қорғау органы ретінде біз де сырт қалмаймыз. Қажет болған жағдайда барлық тиісті шараларды қабылдаймыз», – деді бас прокурордың орынбасары.

Сонымен қатар, ол бұл мәліметтер расталып, ресми шағымдар түскен жағдайда ғана прокуратура нақты әрекетке көшетінін атап өтті.