Қазақстандық оқушылар халықаралық олимпиададан жүлделермен оралды

Ресейде табиғи ғылымдар бойынша IJSO-2025 халықаралық олимпиадасы алғаш рет өткізілді. Қазақстандық оқушылар осы халықаралық олимпиададан жүлделермен оралды, деп хабарлайды Orda.kz.

Ресей Федерациясының Сочи қаласында өткен жасөспірімдер арасындағы IJSO-2025 халықаралық жаратылыстану олимпиадасы өз мәресіне жетті. Білім додасына әлемнің 21 елінен 120-дан астам оқушы қатысып, физика, химия және биология пәндері бойынша өз білімдерін сынға салды.

Қазақстанның түрлі мектептерінен қатысқан 6 жоғары сынып оқушысы 3 күміс және 3 қола медаль жеңіп алды.

IJSO-2025-ке әлемнің 20-дан астам елінен оқушы қатысты. Байқау тест, теориялық және практикалық турлардан тұрды. 

Күміс медаль иегерлері:

• Ратмир Кутырев – Алматы қаласындағы РФММ 10-сынып оқушысы; 
• Даниил Перепелица – Павлодар қаласының дарынды балаларға арналған №8 лицей-мектебінің 9-сынып оқушысы;
• Мухаммад Сыздықов – Жамбыл облыстық дарынды ер балаларға арналған мамандандырылған Білім-инновация лицей-интернатының 10-сынып оқушысы.

Қола медаль иегерлері:

• Тимур Алпысбаев – Астана қаласындағы «NURORDA» мектеп-лицейінің 9-сынып оқушысы;
• Ерасыл Дүйсенбеков – Абай облыстық дарынды балаларға арналған мамандандырылған Білім-инновация лицейінің 10-сынып оқушысы;
• Нұрсейіт Сейтқазиев – Ақтөбе облыстық дарынды жасөспірімдерге арналған мамандандырылған Білім-инновация лицей-интернатының 9-сынып оқушысы.