Қазақстан жастары шахматтан әлем чемпионатында күміс жүлде алды

2025 жылы Александрия қаласында (АҚШ, Вирджиния штаты) өткен мектеп командалары арасындағы FIDE World Schools Team Championship әлем чемпионатында Алматыдағы Республикалық физика-математика мектебінің (РФМШ) командасы екінші орын алды, деп Orda.kz Қазақстан шахмат федерациясына сілтеме жасап хабарлайды. 

Жеке есептегі жетістіктер:

Иманғали Ақылбай – алтын медаль
Эдгар Мамедов және Зарина Нұрғалиева – қола медаль

Чемпионатқа 48 елден 55 команда қатысты. Бұл жолғы жарыстың ерекшелігі — жас ерекшелігіне байланысты шектеу болмаған. Қатысушылар спорттық іріктеу нәтижесі бойынша таңдалды, ал қыздар мен 12 жасқа дейінгі ойыншылардың болуы міндеттелмеді.

Нәтиже келесідей:

• Velammal MHS мектебі (Үндістан) – барлық 8 матчта жеңіске жетіп, абсолютті чемпион атанды;
• Республикалық физика-математика мектебі  (РФММ Алматы) – 8 ойыннан 6 ұпай жинап, екінші орын;
• Harker мектебі (АҚШ) – 5 ұпай, үшінші орын;
• Республикалық физика-математика мектебі -2 (РФММ Астана) – 4 ұпай, төртінші орынға бір-ақ ұпай жетпей қалды.

Турнир швейцарлық жүйе бойынша 8 раундтан болды және 3–6 тамыз аралығында Александрия қаласындағы Епископалды орта мектепте өтті.

 Бұған дейін де қазақстандық оқушылар Боливияда өткен беделді олимпиадада жоғары нәтиже көрсетіп, сондай-ақ қыздар арасындағы халықаралық бағдарламалау олимпиадасында қола жүлдеге ие болған еді.

Бұған дейін де қазақ елінің  13 жасар шахматшысы  Халықаралық шебер атағына ие болғанын хабарладық.  Дүниежүзілік шахмат олимпиадасының чемпионы атағын алған қазақстандық шахматшыға итальяндықтар тәнті болды. 

2023 жылы Тоқаев Қазақстанда шахматты дамытуға айрықша көңіл бөлінетінін айтқан болатын.