Қазақстан шетелдік компаниялармен жасалған мұнай-газ келісімшарттарын қайта қарастыра ма?

Энергетика министрлігі Қазақстан үшін тиімдірек шарттармен мұнай өндіру келісімдерін қайта қарау мүмкіндігіне қатысты пікір білдірді, деп хабарлайды Orda.kz.       

БАҚ сауалына жауап ретінде салалық ведомство бұл бағыттағы жұмыстар мемлекет стратегиясы мен саясаты аясында жүргізіліп жатқанын нақтылады. Биылғы жылдың алғашқы алты айында елде 34,5 миллиард текше метр газ өндірілген. Ал мұнай мен газ конденсатын өндіру көлемі 49,9 миллион тонна болды.

«Елдің ұзақ мерзімді мүдделерін ескеріп, қолданыстағы келісімшарттық міндеттемелердің сақталуын қамтамасыз ету үшін сапалы әрі байыпты шешімдер қабылдау маңызды. Алайда келісімдер құпия сипатта болғандықтан және талқыланып жатқан факторлар шешім қабылдауға тікелей әсер ететіндіктен, ресми ұстаным әзірленбей тұрып қандай да бір ақпаратты жария ету мүмкін емес» деп жазылған министрлік жауабында. 

Ал бұл арада елде өзге салаларда да қуат көздері кеңейтіліп жатыр. Соның ішінде, жаңартылатын энергия көздері (ЖЭК) саласында.

Бүгінгі таңда Қазақстанда 3 ГВт-тан астам электр қуатын өндіретін 156 ЖЭК нысаны жұмыс істеп тұр. Өткен жылдың қорытындысы бойынша, ЖЭК үлесі жалпы электр өндіру көлемінің 6,43%-ын құрады. Бұл көрсеткішті 2030 жылға қарай 15%-ға, ал 2050 жылға дейін 50%-ға дейін жеткізу жоспарланып отыр (оның ішінде балама энергия көздері де бар).

«2030 жылға дейін жалпы қуаты 2,2 ГВт-тан асатын 91 ЖЭК жобасын іске қосу көзделген. 2024–2027 жылдарға арналған аукциондық сауда-саттық жоспарына сәйкес, қосымша 6,7 ГВт жаңа ЖЭК қуатын енгізу жоспарланып отыр. Ал 2035 жылға дейін электр энергетикасы саласын дамыту жөніндегі іс-шаралар жоспары аясында кемінде 8,4 ГВт жаңа ЖЭК қуатын іске асыру қарастырылған» деп көрсетілген мәліметте.

Ведомство ЖЭК саны мен үлесін қысқарту жоспарланбайтынын мәлімдеді. Керісінше, олардың ұлттық энергетикалық жүйенің тұрақтылығы мен сенімділігін қамтамасыз етудегі рөлі арта түседі.

Ең маңызды бағыттардың бірі – ЖЭК-ті энергияны сақтау жүйелерімен біріктіру, бұл электрмен жабдықтау сапасы мен үздіксіздігін арттыруға мүмкіндік береді.