Қазақстан МАГАТЭ қатарында теңдікке ұмтылады

Қазақстан бастамашы болған қарарды 99 мемлекет қолдады. МАГАТЭ Бас конференциясының 67-сессиясында «МАГАТЭ-ге мүше мемлекеттердің егемендік теңдігін қалпына келтіру туралы» қазақстандық қарар басым көпшілік дауыспен (99-2-16) қабылданды.

 Қаулыны Қазақстан Республикасы Сыртқы істер министрінің бірінші орынбасары Қайрат Омаров таныстырды және оны МАГАТЭ-нің барлық географиялық аймақтарын білдіретін 99 мүше және 56 тең демеуші мемлекеттер қолдады. Бұл туралы Сыртқы істер министрлігінің баспасөз қызметі хабарлады.

Қазақстан бастамашы болған қарар МАГАТЭ қызметіне мүше мемлекеттердің қатысуына неғұрлым әділ және демократиялық көзқарастарды қамтамасыз ету үшін негіз жасайды. Қазақстанның Агенттіктегі егемендік теңдікті қалпына келтіру жөніндегі күш-жігері аясында Қазақстан МАГАТЭ тарихында алғаш рет аймақтық топтарға кірмейтін 17 елдің тізімін кодификациялады.

Бұл тізім Агенттіктің 2023 жылғы 10 тамыздағы ресми құжатында бекітілді және Словения төрағалығымен құрылған «Аумақсыз мүше мемлекеттердің достық тобы» шеңберінде одан әрі жұмыстарды құру үшін негіз ретінде Бас конференцияның қарарына енгізілді.

МАГАТЭ Бас конференциясының резолюциясы сондай-ақ мүше мемлекеттерді Агенттік жарғысының 6-бабына Басқарушылар кеңесінің құрамын кеңейтуді және географиялық аумақтар бойынша мүшелер тізімін қабылдауды көздейтін түзетуді тез арада ратификациялауға шақырады. Қазақстан бұл түзетуді 2019 жылы ратификациялады.

Резолюцияның қабылдануы мүше мемлекеттердің аймақтық топтарда, негізгі саясатты қабылдаушы органдарда, сондай-ақ Агенттіктің тиісті консультативтік үдерістерінде тең өкілдік ету мәселесін қайта жандандырудың алғашқы практикалық қадамы болды.