Қазақстан КҚК арқылы мұнай экспортының жартысына жуығын жоғалтты

2026 жылғы қаңтарда Каспий құбыр консорциумы (КҚК) терминалы арқылы қазақстандық мұнай экспорты күрт азайды, деп хабарлайды Orda.kz.

CPC Blend маркалы мұнайды жеткізу тәулігіне 800–900 мың баррельге дейін төмендеген. Бұл — желтоқсан айының ортасында жоспарланған көрсеткіштерден 45%- ға аз.

Трейдерлер жоспарланған 45 жөнелтімнің кемінде 21-ін тоқтатқан. Терминалдағы іркілістер нарыққа әсер етіп, бағаның өсуіне түрткі болды. Жақында CPC Blend партияларының бірі Dated Brent бағасына барреліне 1,2 доллар сыйақымен саудаланды, ал күтілген диапазон 60–80 цент болған.

Бұл жағдайға бірнеше фактор себеп болған. Қараша айында дрондар шабуылынан кейін КҚК айлағының құрылғысы істен шыққан. Екіншісі жоспарлы жөндеуде тұр, оны желтоқсанда аяқтаймыз деп уәде етілген. Алайда Қара теңіздегі дауылдар тиеу жұмыстарын жиі тоқтатып, жөндеуді аяқтауға кедергі келтіріп отыр. Соның салдарынан терминал тұрақсыз режимде жұмыс істеуде.

Bloomberg агенттігінің мәліметінше, КҚК мұнай қоймалары толып кеткен. Осыған байланысты құбыр жүйесі уақытша өндірушілерден мұнай қабылдауды тоқтатқан.

КҚК Қазақстан мұнайын тасымалдаудағы негізгі бағыт болып қала береді. Елде тәулігіне шамамен 1,8 млн баррель мұнай өндіріледі. Алайда балама маршруттар арқылы оның тек жартысына жуығын ғана экспорттауға мүмкіндік бар.

Айта кетейік, Ержан Қазыхан Қазақстан президенті атынан АҚШ-пен келіссөздер жүргізеді.